Түркістан облысының әкімі Өмірзақ Шөкеев Арыс қаласын қалпына келтіру жұмыстары бойынша жиын өткізді. Жиынға ҚР Индустрия және инфрақұрылымды даму вице-министрі, ҚР Қорғаныс министрлігінің өкілі, қаладағы 17 секторға жауапты облыс, аудан өкілдері, облыстық басқарма басшылары қатысты.
Арыс қаласындағы қарқынды құрылыс жұмыстарының барысы баяндалып, жұмысты жеделдету бойынша ұсыныстар жиында айтылған болатын. ҚР Индустрия және инфрақұрылымды даму вице-министрі Қайырбек Өскенбаев әрбір секторға жауапты облыстардың жұмысына тоқталып, жұмыс барысында туындаған мәселелердің шешіліп жатқандығын жеткізді. Облыс әкімінің кеңесшісі Ұласбек Сәдібеков халық арасында түсіндірме жұмыстарын жүргізуге тартылған белсенділердің тұрақты жұмыс атқарып жатқандығын баяндады. Облыс әкімі қала тұрғындарының талап-тілектерін назардан тыс қалдырмай, жұмысты одан әрі жүйелі түрде жүргізуді тапсырды.
Түркістан облыстық полиция басқармасы басшысының орынбасары Әбдіғани Сейдуалиев қала тыныштығын қамтамасыз ету жұмыстарының күшейгенін, құқықбұзушылықтарды алдын алу жұмыстары ұдайы жүргізіліп жатқандығыны жайлы сөз етті. Жиын соңында Өмірзақ Естайұлы қала тұрғындарының хал-ахуалын үнемі бақылауда ұстап, мемлекет тарапынан көрсетіліп жатқан көмектерді алу барысын, құрылыс жұмыстарын жеделдетуді жүктеді.
