Кеше Шымкент қаласында Қазақстан Республикасының Мәдениет және ақпарат министрлігі Этносаралық қатынастарды дамыту комитетінің «Қоғамдық келісім» республикалық мемлекеттік мекемесі ұйымдастырған «Елдесу және татуласу» жобасы аясында медиация институтын дамытуға арналған семинар-тренинг басталды. Бұл шараның негізгі мақсаты – этносаралық қатынастарды нығайту, медиацияның әлеуетін арттыру және халық арасында бірлік пен татулықты қалыптастыру.
Семинар М.Әуезов атындағы Оңтүстік Қазақстан университетінде жалғасын тауып, қатысушыларды этномедиацияның маңыздылығымен таныстырды. Семинарды Шымкент қаласы ішкі саясат және жастар істері жөніндегі басқармасының «Қоғамдық келісім» мекемесінің басшысы Нұркен Әлімқұлов ашты. Ол өз сөзінде этномедиацияның қоғамдағы рөлі мен қажеттілігін атап өтті.
Этномедиация – этностар арасындағы дауларды шешу және келісімді орнату үшін қолданылатын бейбіт тәсілдердің жиынтығы. Бұл процесс дауларды сот арқылы емес, медиация арқылы шешуге бағытталған, яғни медиаторлар тарапынан қолдау көрсетіледі. Нұркен Әлімқұловтың айтуынша, этномедиацияның әлеуеті этносаралық қарым-қатынастарды реттеуде аса маңызды рөл атқарады. Ол этникалық топтар арасында сенімді қалыптастырады, әлеуметтік тұрақтылықты қамтамасыз етеді.
Семинар барысында қатысушыларға медиацияның түрлі аспектілері, оның ішінде этносаралық қарым-қатынастардағы рөлі, медиацияның әдістері мен техникалары таныстырылды. Семинарға қатысушылардың арасында жоғары оқу орындарындағы ҚХА орталығының мамандары мен оқытушылары, мемлекеттік мекемелер мен құқық қорғау органдарының қызметкерлері болды. Олар этномедиацияның тиімді әдістері туралы ақпарат алып, практикалық дағдыларын дамытуға мүмкіндік алды.
Семинар-тренингте ҚР Мәдениет және ақпарат министрлігі Этносаралық қатынастарды дамыту комитетінің сарапшысы Талшын Италиева, Қазақстан халқы Ассамблеясы республикалық Этномедиация кеңесінің төрағасы, Ұлттық Құрылтай мүшесі Шерзод Пулатов, психолог-конфликтолог Резеда Баймухаметова секілді білікті мамандар дәріс оқып, тыңдаушыларға тәжірибелерімен бөлісті. Олар медиацияның қоғамдағы рөлі мен оның тиімділігін арттыру жолдары туралы өз пікірлерін ортаға салды.
Медиация – бұл дауларды шешудің тиімді жолы, себебі ол тараптар арасында ашық диалог құруға, бір-бірін түсінуге, келісімге келуге мүмкіндік береді. Медиация кезінде тараптардың мүдделері ескеріледі, бұл дауларды сот арқылы шешуден гөрі, әлдеқайда нәтижелі болып табылады. Олар тараптардың пікірлерін тыңдайды, дау-жанжалды реттеуге көмектеседі және қажетті ақпаратты береді. Осылайша, медиация барлық қатысушылар үшін тиімді шешімдер табуға ықпал етеді.
«Елдесу және татуласу» жобасы – Қазақстанның мәдени және әлеуметтік интеграциясын қолдауға бағытталған маңызды бастама. Бұл жоба арқылы елдегі этносаралық келісімді нығайту, қоғамдағы татулықты арттыру және азаматтар арасында сенімді орнату көзделеді.
