Шымкент қаласында биыл 9 нысанда жол құрылысы мен қайта құру жұмыстары жүргізіліп, жыл соңына дейін пайдалануға беріледі.
Олардың көпшілігі қаладағы кептеліс мәселесін шешуге елеулі ықпал ететін ірі нысандар. Сонымен қатар, жалпы ұзындығы 201.7 шақырымды құрайтын 253 көше орташа жөндеуден өтеді.
Жол құрылысы және қайта құру жұмыстары жүргізіліп, 2023 жылдың соңына дейін пайдалануға берілетін нысандардың қатарында Д.Қонаев даңғылы жалғасының 3-ші кезеңі, А-2 айналма жолының 2-ші, 4-ші кезеңдері, Өтегенов көшесінің жалғасы және Ж.Адырбеков көшесін қайта құру жұмыстары бар. Бұдан бөлек, биыл Бәйдібек би – Арғынбеков көшелерінің қиылысында салынып жатқан жолайрықтың 1-ші кезеңінің құрылысы аяқталады. Сонымен қатар, шығыс айналма жолының бірінші кезеңі пайдалануға беріліп, Темірлан тас жолының бойында жаяу жүргіншілерге арналған өткел салынады.
Ал, орташа жөндеу жұмыстарына тоқталар болсақ, биыл магистралды және ішкі орамдық 253 көшенің асфальт жабыны жаңарады. Олардың жалпы ұзындығы 201.7 шақырымды құрайды.
Өткен 2022 жылы Шымкент қаласындағы жақсы және қанағаттанарлық жағдайдағы жолдардың үлесі 67.4 пайыз болған. Жоғарыда аталған ауқымды жұмыстың нәтижесінде биыл жыл соңында бұл көрсеткіш 71.2 пайызға дейін жақсарады деп жоспарланған.
Айта кетейік, өткен жылы Шымкентте автомобиль жолдары саласында 158 нысанда жөндеу жұмыстары жүргізілген болатын. Оның ішінде 3 нысанда құрылыс және қайта жаңарту, тағы 3 нысанда күрделі жөндеу жұмыстары жүргізілді. Басқарма мәліметінше, 2022 жылы жалпы ұзындығы 256.3 шақырымды құрайтын 152 нысан орташа жөндеуден өткен. Сонымен қатар, жалпы ұзындығы 122,7 шақырымдық топырақ көшелерге шағал тас төселген.
