2010-2011 жылдары «Нұрлы көш» пилоттық бағдарламасы арқылы Шымкент қаласының «Асар» шағынауданында 975 тұрғын үй салынған болатын. Бағдарламаның мақсаты – отандастарымызды атамекенге қайтару, сондықтан елге оралған қандастарымызға сатып алу құқығымен тұрғын үйлер бастапқыда 8 жылға жалға берілді.
Қазіргі таңда бағдарлама арқасында жақын шет елдерден Шымкент қаласына қоныс аударған 975 отбасының 927-і жалға алған үйлерін «Отбасы банк» арқылы ипотекалық несие негізінде рәсімдеуде. «Отбасы банк» талаптарына сәйкес несие уақытын өткерген соң қандастар тұрғын үйді жекеменшік иелікке рәсімдей алады.
Айта кетейік, қалған 48 отбасы тұрғын үйлерді «Отбасы банкпен» рәсімдеу жұмыстарын жүргізу мәселелерін шешу мақсатында ҚР Еңбек және әлеуметтік қорғау министрлігіне Шымкент қалалық тұрғын үй басқармасы арқылы хат жолданған. Министрліктің жауабына сәйкес тиісті жұмыстар жүргізілетін болады.
Еске сала кетейік, 2022 жылы «Нұрлы көш» пилоттық бағдарламасы арқылы алған баспанасын 613 азамат Отбасы банк арқылы ипотекалық несие негізінде рәсімдеп, бағдарламаның талап шартын орындаған болатын. Аталған тұрғын үйлер Асар шағын ауданында орналасқан болатын. Бұл тұрғын үйлер 2010-2012 жылдар аралығында бағдарлама шеңберінде Асар шағын ауданында Өзбекстан елінен келген қандастарға сатып алу құқығымен 8 жылға жалға берілетін болған еді.
Шымкент қаласы әкімінің баспасөз қызметі
