Шымкентте ауылшаруашылығы өнімдерін сақтайтын қойма кешендері көбейеді. Бүгінде сауда-логистикалық орталығында «НМИ — ЮГ» көп функционалды қойма кешені салынуда. Қала әкімі М.Әйтенов жауаптылармен бірге алаңда болып, құрылыс барысын тексерді.
Жобаға сәйкес, ғимараттың аумағы 22 мың шаршы метрге жуықтайды. Тоңазытқыш камерасында тәулігіне 1455 тонна өнім сақтауға болады. Ал ұн өнімдерін сақтайтын орында 327 тонна тауар сақтауға мүмкіндік бар. Кешен іске қосылғанда 100 ден астам адамды жұмыспен қамтиды.
Қазір өндірістік кестеге сәйкес құрылыс-монтаждау жұмыстары 30 пайызға аяқталған. Жоспар бойынша қойма кешені келесі жылы қолданысқа беріледі.
М.Дүйсенбекұлы жауаптыларға жұмыс қарқынын күшейтіп, сапаны назарға алу қажеттігін ескертті. Сондай-ақ, нысанды шаруаларға қолайлы етіп жабдықтау бойынша бірқатар тапсырмалар жүктеді.
Еске сала кетейік, Мұрат Әйтеновтің төрағалығымен ауыл шаруашылығындағы кластерлі жобаларды талқылауға арналған , кәсіпкерлердің қатысуымен өткен жиында мегаполистің агросаласын дамытуда маңызы зор, ілкімді жобалармен қатар саланың экспорттық әлеуетін арттыру жолдары қарастырылған болатын.
«Қазір мегаполистің агломерациялық дамуына байланысты қалада агроөнімдер өндіретін кәсіпорындар қатарын арттыруға күш салуымыз керек. Кәсіпкерлерді ынталандыру үшін тиісті жұмыстарды жүйелі ұйымдастырыңыздар. Кластерлі жобаларды ғылыми сүйемелдеу мәселесіне де назар аудару қажет» — деген болатын қала әкімі сол жиында.
Шымкент қаласы әкімінің баспасөз қызметі
