Премьер-Министр Олжас Бектеновтің төрағалығымен өткен Қазақстан Республикасы Үкіметінің отырысында «Ауылдық денсаулық сақтауды жаңғырту» пилоттық ұлттық жобасын іске асырудың қазіргі жағдайы қаралды. Жүргізіліп жатқан жұмыстар туралы ҚР денсаулық сақтау министрі Ақмарал Әлназарова баяндады, деп хабарлайды Primeminister.kz.
Бүгінгі таңда Ұлттық жоба шеңберінде Денсаулық сақтау министрлігі Өнеркәсіп және құрылыс министрлігімен бірлесіп мемелекеттік сараптама қорытындылары негізінде жобалау-сметалық құжаттаманы әзірлеп, байланыстыру жұмыстарын толығымен аяқтады. Құрылысы жоспарланған 655 МСАК нысанының ішінде 22,9 млрд теңгеге 102 нысандағы құрылыс жұмысы аяқталды.
Бүгінгі таңда облыс әкімдіктерімен жергілікті бюджеттерден 551 нысанға бірлесіп қаржыландыру көзделген. 441 нысанның құрылысы бойынша шарттар жасалды. 107 нысан бойынша конкурстық рәсімдер жүргізілуде.
Биыл 355 нысанның құрылысына республикалық бюджет және Үкімет резерві есебінен қаражат бөлу көзделген.
194 нысанның құрылысына қаржы министрлігімен бірлесіп бұрын қабылданған қаулыға өзгерістер енгізу арқылы Үкімет резервінен қаражат бөлу жоспарлануда.
Еске сала кету керек, 2023 жылдан бастап Мемлекет басшысының тапсырмасына сәйкес «Ауылда денсаулық сақтауды жаңғырту» пилоттық ұлттық жобасы іске асырылып жатыр. Жобаның аясында 3 міндет іске асырылуда:
*655 медициналық-санитариялық алғашқы көмек нысанын салу;
*жұмыс істеп тұрған аудандық ауруханаларды жаңғырту және оларды жарақтандыру арқылы 32 заманауи ауданаралық көпбейінді орталық аурухананы ұйымдастыруды қамтитын ауыл халқына шұғыл медициналық көмек көрсетудің қолжетімділігін арттыру;
*ауылдағы денсаулық сақтау нысандарын медициналық кадрлармен қамтамасыз ету.
