Қоғамда өзекті мәселелердің біріне айналған отбасылық ажырасу мәселесі өз деңгейінде қамқорлыққа алынуда. Шымкентте Отбасы, балалар және жастар істері жөніндегі басқарма жанында «Отбасы кеңесі» пилоттық режимде жұмыс істеуде. Аптаның әр сейсенбі күнінде бас қосатын «Отбасы кеңесі» – ажырасуға арыз берген азаматтармен бетпе-бет сөйлесіп, отбасының бұзылуына әсер еткен факторларды талдап, өзекті мәселелермен жұмыс істейді.
Жұмыс тобына заңгерлер, психологтар, ақсақалдар, мемлекеттік органдардың өкілдері кіреді. Кеңестің жұмысы отбасының сақталуына және ажырасу рәсімдерін қысқартуға ықпал етеді. Бұл туралы брифингте Шымкент қаласының отбасы, балалар және жастар істері жөніндегі басқарма басшысы Жандос Қалтаев мәлімдеді.
Оның айтуынша, 9 кездесу өткізіліп, нәтижесінде 33 неке сақталды. Жұмыс принципі келесідей: ажырасуға өтініш берген барлық ерлі-зайыптылар Отбасы кеңесіне барады. Мұнда мамандар олармен, соның ішінде медиаторлармен жұмыс істейді. Олар қақтығыстың деңгейін анықтайды. Егер ерлі-зайыптылар арасында қаржылық мәселелерге байланысты келіспеушіліктер туындаса, мемлекеттік органдардың өкілдері мемлекеттік бағдарламалар бойынша кеңес бере алады. Жұмысқа орналасуға көмектеседі, уақытша жәрдемақыны алу үшін қажетті құжаттарды ала алады. Егер келіспеушіліктің себебі түсінбеушілік болса, онда отбасылық психологтар қатысады, ал ақсақалдар өздерінің өмірлік тәжірибелерімен бөліседі.
– Пилоттық режимде біз ажырасуды төмендететін индикаторды енгіздік. «Отбасы көңілділігі» жобасының («Отбасы кеңесі») басты мақсаты – ажырасу деңгейін төмендету, отбасы мүшелерінің құқықтарын қорғау, кәмелетке толмағандардың құқықтарын құрметтеу және отбасылық құндылықтарды насихаттау. Тәжірибе көрсеткендей, татуласу рәсімдері ажырасу алдында тұрған некені сақтап қалуға көмектеседі, – дейді басқарма басшысы Жандос Қалтаев.
Еске сала кетсек, 2018 жылы Шымкент қаласы бойынша жалпы неке саны 6 825 құраса, 2019 жылдың қыркүйегінде – 4 392 құрады. Өткен жылы ажырасулар саны 2617-ге, 2019 жылдың қыркүйегінде – 1 689-ға жетті.
